C PROGRAMMING ZIR VE RAWH

Computer Programming zir tan tur a kan inchahna leh kan inhmelhriattir na Post lam kha i lo chhiar ve a nih chuan tun a kan sawi tum hi chu i hriatthiam ve nel nual tawh chu ka beisei.

Programming languages hrang hrang a awm a, chung zing a pakhat "High-level language" kan tih zing a mi, C language nen hian han inhmelhriat tir che ka duh a, i khawih tam poh leh i ngaina ang !
Tin, he tutorial/guide hi Windows Operating System tan bik a ka ziah a  ni. Linux emaw Mac emaw tan chuan a dik ve kher lo lai a awm ang tijh min hriatsak lawk dawn nia!!

C History Tawite
C Programming hi 1969 leh 1973 inkar vel a Dennis Ritchie-a'n AT&T Bell Labs a a siam a ni a, UNIX operating system siam nan a hman hmasak ber a ni. Siam a nih atanga tun thleng hian khawvel a Programming language hman nasat ber leh tangkai ber a ni.

A history chung chang ah  chuan buai thui vak lo mai ila, hriat belh duh i neih chuan han Google keuh la, a mak a mak a tam a lo awm thut mai ang!

He article ah hi chuan C Programming la hre lo, hre ve duh, ti chhin ve hrim hrim duh te tan tawi te in ka rawn sawi dawn a ni. Enge kan mamawh tihte, kan hriat tur tul leh kan program hmasa ber code nen ka rawn share dawn a ni.

Eng hmanrua nge kan mamawh?

A hmasa berin Computer awm rawh se. I ta a ni emaw, school a mi a ni emaw, i pate-a te ta a ni emaw, in thenawm te ta a ni emaw, program code i ziahna tur computer chu a awm hmasak ber a ngai! Tunlai ah Android apps C compile theihna a awm tawh a ni mai thei a (ka la check hlawm chiah lo!), a awm a nih pawn compile vek theih loh chin chu a nei dawn!

A dawt leh ah chuan kan code ziahna tur software/application kan mamawh leh ang. Heng programming language ziahna (compile thei nghal bawk) software ho hi IDE (Integrated Development Environment) an ti thin a, IDE ti in kan sawi tawh ang.

IDE tel lo pawh hian Notepad a code ziahin GCC compiler in Command Prompt atangin a run theih tho a, awlsam zawk leh hman nuam zawk a nih avangin IDE hman mai hi a tha zawk rih a ni!

Windows OS hmangtu te tan a IDE hman tam ber chu Dev C++ hi a ni awm e. I download duh chuan i DOWNLOAD thei ang ! I download zawhah install la, installation ah i buai chuan comment ah i sawi mai dawn nia!


A hmanrua ang zawng chuan a dang teh chiam kan mamawh lem lo!

Dev C++ hman dan, a lem nen tlem i lo en thuak thuak ila:

I install zawh chuan Dev C++ ah chuan lut la,
File > New > Source File ah lut rawh.  A nih loh paw'n Ctrl+N ti ringawt paw'n i direct thei.

Chutah chuan code chhutna tur a lo lang ang. A hnuai a mi khu copy la, i paste dawn nia.

Note: I copy dawn chuan select phawt la, Right-click lo in Ctrl+C i hmang dawn nia.

Code #1:

1 2 3 4 5

#include<stdio.h> int main() { printf("Chibai Le, Thiante u!"); }

I paste zawh ah save la, File > Save emaw Ctrl+S a file hming ah engpawh i hmang thei a, a File Extension erawh  .c emaw .cpp a i dah a ngai. 

I save zawh ah Execute > Compile & Run ah lut la, a in compile ang a, a in run nghal bawk ang. Hemi atan hian F11 key pawh kha direct in i hmang thei a ni!

I code a dik chuan a hnuai a mi ang hian a lo lang ang.

Hei hi C Program simple ber a ni. Line 5 chauh kan hmang a, C code then khat chu line maktaduai fe chuang te pawh a awm thin a ni.

Han ti chhin la, C code dang te  han zawn belh la, Copy/Paste kha inthlahrung lo phawt mai la! Ama'rawhchu, line tin khan enge hna a thawh tih hriat tum in i en thin bawk dawn  nia.

I zir belh duh chuan kan sawi tawh ang khan YouTube ah te pawh Free Tutorial tam tak zir sen loh a awm a ni kan tih tawh kha! A lehkhabu ang zawng pawn tam tak a awm a , i lei thei a nih chuan Yashawant Kanetkar ziah "Let Us C" tih te hi han chhiar la, i man chho zel ang a i tui zel mai dawn a ni!

Program dang source code leh a hrilhfiahna  nen ka la rawn let leh dawn nia.