Ni 2-na: Dik famkim tumna hi hma kan sawn theih loh phahna a ni fo!

Ni khatna ka ziah atang khan ka reh leh vang vang a; mimal thila ka zin vangin ziahna hun ka nei thei meuh lo! A ni hnihna atan chuan "Dik famkim" (perfect) kan tum lutuk vanga bul kan ṭan phah theih loh fo dan te, kan thlen chin aṭanga hmasawn kan harsat em em dan ka hriat ka lo sawi ve leh ang e.

Note: Ka thuziah ho hi ka lo inzir chhuah tawh a ni kher lo va, ka nun a apply theih rih loh tam tak ka la nei ve tho.

Kum 2015 vel aṭang khan startup company ṭha tak din hi ka lo tuipui tawh a. Thil kalphung pakhat mah hre lovin eng thil thil emaw ka ti ve tawh ṭhin. Ka lehkha zirlai a la nih vang leh dinhmun in a zir loh avangin ka hun ka pe tam thei lo va. Ka duh anga tih chhunzawm theih ka nei ngai lo. College kan han zo va, ka ṭhianpa Joseph-a nen company (Thingpui Software Solutions LLP) kan han din ve rawih mai a. Pathian leh mi duhsakna azarah tluang takin kum 1 dawn kan kal chho ve ta reng mai.

2015 aṭanga tun hun thleng hian idea tam tak kan rilru ah a lo lut tawh a, bul la ṭan loh leh, bul ṭan tawh si chhunzawm theih loh kan nei nual. Rokhawlhna avanga chawlhsan rih pawh a awm tho va. 

Hetiang zawng zawng ka ngaihtuah hian bul kan ṭan theih loh leh kan pam ṭul ṭhin te hi a chhan tam tak chu tih dik famkim kan tum lutuk vang a ni ber. Perfect taka tih tum si, kan thil thiam a la perfect si loh vang hian kan khawmuang leh fo ṭhin.

A pawnlang ah chuan kan thatchhiat vang leh, kha hna kha a ninawm vang emaw tih a awl viau! Kan taima tawk lo na meuh mai. Chutih ruala a chhan ni ber a lang zawk chu, kan thilsiam chhuah te miin a ṭha lo an tih kan hlauh lutuk vang a ni fo.

Eng hna thawk pawh, mistiri, thuziakmi, YouTuber, musician, sawrkar hnathawk, zirtirtu, etc., kan kutchhuak, kan hnathawh te miin a ṭhat lohna lai an hmuh kan hlauh lutuk vang hian kan phur loh phah a, kan khawmuan phah ve fo ṭhin mai thei.

Hna kher ni lo, kan tuina lam thil eng ah pawh perfect kan tum lutuk vang hian kan tui rei lo ṭhin. Middle school leh high school kal lai khan lemziah hi ka tui ve ṭhin a, ka lemziah te a ṭha tawk lo va ka hriat vang in 2013 aṭang khan ka ziak leh tawh lo. Chutiang bawkin blog hi mumal taka maintain ka duh ṭhin a, ka ziak thiam lo ni a ka inhriat avangin ka ziak ṭha peih lo ṭhin. Mi in an lo chhiar a, min lo validate ka hlauh vang in ka ziak ṭha peih lo fo!

I thil tih tum i tih theih loh fo chhan kha motivation i neih tawk loh vang a ni vek kher lo, i thatchhiat vang a ni vek kher lo, midang hmuha ṭhat tawk loh i hlauh lutuk vang a ni ve thei. Chutiang vang mai mai a bul ṭan ngam loh emaw, chhunzawm ngam loh kha a ṭha ber dawn em ni?