"Be Curious. Not Judgemental" , Walt Whitman-a kamchhuak a ni a; ka hun tawn mek nen a inmil em avangin ka rilru ah a cham reng mai a, ka hriatthiam dan ang ang in ka han sawi ve ang e.
He quote hi Ted Lasso series ka en atanga ka hriat a ni a, ka han google nghal vat a, keimah ka in en let a, ka dik lohzia a rawn lang nghal chuai chuai mai! Ka dilchhut emaw ka tih mek lai hian mi teh (judge) ka duh vang zawka zawhna zawt thin hi ka lo ni reng em? Ka inzawt nasa khawp mai a, hemi chungchanga mi thuziah pawh ka chhiar kual nual a. I lo hlawkpui ve takin, ka han share ve ang e.
A awlsam zawk nan : curious = dilchhut , judgemental = mi teh or mi teh hrat
Kan curious a nih chuan thil thleng kan hmachhawn reng reng hian a chhe lam turah kan ngai nghal ngawt lo! Kan judgemental anih ve thung chuan a chhe lam hawi zawng a ni turah kan ngai nghal tlangpui!
Curiosity hi chu thil hriatchian duh vanga ngunthluk taka zawhna kan zawhfiah hi a nih mai hmel a; Judgement erawh hi chu sawi theih thui tak a awm ang!
Mi kan judge duh vang a zawhna kan zawhfiah hian keimahni ngei pawh hian kan va judge dawn tih kan hre kher lo vang; ama'rawhchu, kan tih ṭhan tawh thin avangin kan lo judge leh zung zung mai ṭhin. Keimahni hi kan judgemental viau in kan inhre lo fo reng a ni!
Tin, judgement hian lanchhuah dan hrang hrang a lo nei ve hrim hrim bawk in ka hria. A chang in, "thudik ka hre duh mai a ni" tih vangin zawhna ṭul lo tak tak kan zawt fo thin. A chang chuan fing ber ni a inhriatna avangin mi thil tihsual lai kan chang a, kan hmuh fuh hma chuan zawhna thuk zawk kan zawt zel a, dilchhut satliah emaw ni a kan inhriat lai hian kan rilru dik lo lutuk vang a lo ni fo ṭhin. Bum nih kan hlauh lutuk vang hian zawhna ṭul lo tak tak kan zawt a, mi kan judge leh mai ṭhin.
Judgement hi kan ṭhian ṭha, kan hnungdawl tu emaw kan ti ṭhin. A ni lo. Kan hmelma lian tak zawk a ni. Mihring tu te mah hian teh nih kan duh lo. Ṭul lo taka teh kan nih reng hian min ti luhlul sauh zawk fo!
Curiosity leh Judgement hi thil inang khat a nihna lai tam tak a awm a, an danglamna chiang tak pakhat chu - i curious chuan rilru zau tak in zawhna i zawt ang, i judgemental anih chuan a chhanna tur hre sa ni awm tak in zawhna i zawt ṭhin. A chhanna chu thil ṭha lo lam anih i rin vang a ni chek bawk!
Kan curious vang a zawhna kan zawh hi chu kan hriatloh tak tak vang a zawt kan ni ṭhin. Mi judge kan duh vanga kan zawh erawh chuan a chhanna tur kan hre sa vek tawh in kan inhre fo!
Kan curious chuan uluk takin chhanna kan ngaithla a, fak tur kan zawng a, kan mi biak te nen inpawh takin kan inbe ṭhin.
Curiosity chu a neutral, judgement chuan awn lam a nei sa ṭhin.
I nun nen han en tawn la, i ṭhiante lakah te, i thawhpui te lakah te, i ngaihzawng te lakah te i awm dan ṭhin ngaihtuah la, i curious nge i judgemental zawk le?
Kei chu ka judgemental!
Ka tih tawp hma in thu tawi te kan belh ang e:
I thil duh i neih theih loh chang te,
I thil duh loh a lo thlen chang te,
Nang aia thil ti ṭha leh thiam zawk an awm chang paw'n,
Be curious. Not judgemental.
"Aw" tih aia "Aih" tih chhanna i dawn tam zawk a,
A chhanna tur chiang taka i hriatsa thil a awm paw'n,
Be curious. Not judgemental.
I nunah hmasawn hlei thei lova i inhriat chang te,
I rilru a thil chhelam zawng i ngaihtuah changte a awm paw'n,
Be curious. Not judgemental.
